എയർപോർട്കു-ക്കീസ്‌- പ്രോഫൌണ്ട് പാരടൈം ഷിഫ്റ്റ്‌...!

ധാരണ

ഒരാൾ എയർ പോർട്ടിൽ ചെന്നു..,

അയാളെ നമുക്ക് സൌകര്യത്തിനു വേണ്ടി  അജോയ് എന്ന്  വിളിക്കാം,

നല്ല വിശപ്പുള്ളതിനാൽ അജോയ് നേരെ ചെന്ന് ഒരു പാക്കറ്റ് കുക്കീസ്‌ വാങ്ങി,

ട്രാവൽ ബാഗിൽ വെച്ചു,

പിന്നെ ഇരിക്കാൻ പറ്റിയ സ്ഥലം അന്വേഷിച്ചു നടന്നു...!

അങ്ങനെ ഒരു മൂലയിൽ ഒരാൾ മാത്രം ഇരിക്കുന്ന ഒരു സ്ഥലത്ത് പോയി അജോയ് ഇരുന്നു,

ബാഗ്‌ താഴെ വെച്ചു പോയി മുഖം കഴുകി,

പിന്നെ  ട്രാവൽ ബാഗിൽ നിന്നും കുക്കീസ്‌ എടുത്തു മടിയിൽ വെച്ചു തുറന്നു...!

അപ്പോൾ അടുത്തിരുന്ന ആൾ ഒരു വല്ലാത്ത നോട്ടം നോക്കി,

ആദ്യം കുക്കീസിൽ പിന്നെ  അജോയ് ടെ മുഖത്തും..,

അങ്ങനെ മാറി മാറി നോക്കിയ ശേഷം ഒരു മടിയോ ജാള്യതയോ കൂടാതെ അയാൾ ആ പാക്കറ്റിൽ നിന്നും ഒരു കുക്കീസ്‌ എടുത്തു കഴിച്ചു,

അജോയ് ഞെട്ടി,

എന്താണിത്?

വെള്ളരിക്കാ പട്ടണമോ?

വേറെ ആൾ കാശ് കൊടുത്ത സാധനം ഒരു ഉളുപ്പും ഇല്ലാതെ എടുത്തു കഴിക്കുന്നു,

ആരെയും വെറുപ്പിക്കാൻ പറ്റാത്ത സ്വഭാവം ആയതിനാൽ അജോയ് ഒന്നും മിണ്ടിയില്ല,

എന്നാൽ അയാൾ അത് കൊണ്ട് നിറുത്തിയോ,

ഇല്ല...!

അജോയ് ഓരോ കുക്കീസ്‌ എടുക്കുമ്പോഴും മത്സരമെന്നോണം  അയാളും ഓരോന്ന് എടുത്തു കൊണ്ടിരുന്നു...!

നാണമില്ലാത്ത ഇയാളെ എന്ത് പേരിട്ടു വിളിക്കണം,

നാളെ ഇയാളെ പറ്റി എന്ത് പോസ്റ്റ്‌ ഇടണം എന്നൊക്കെയുള്ള  ആലോചനയിൽ അജോയ് ഇരുന്നു,

വൃത്തി കെട്ടവൻ,

അപ്പോൾ ആണ് കുക്കീസ്‌ ബോക്സിൽ ഒരെണ്ണം മാത്രം അവശേഷിച്ചത്,

അജോയ് അത് എടുക്കും മുൻപ് നാണം കേട്ട ആ മനുഷ്യൻ അതും  എടുത്തു,പക്ഷെ എന്തോ കനിവ് കാണിക്കുമ്പോലെ അത് അയാൾ രണ്ടായി പൊട്ടിച്ച് ഒരു കഷണം അജോയ്ക്ക് കൊടുത്തു,

ഹോ അത്രയും ആശ്വാസം...!

അതും കൂടി കഴിച്ച ഉടനെ അയാൾ എണീറ്റ്‌ ഒരക്ഷരം പോലും പറയാതെ അയാളുടെ ബാഗും എടുത്തു ഒറ്റപ്പോക്ക്‌...!!!

എന്തൊരു മനുഷ്യനാണപ്പാ???

അജോയ് ആ വാശിയിൽ പോയി ഒരു പാക്കറ്റ് കുക്കീസ്‌ കൂടി വാങ്ങി കൊണ്ട് വന്നു...!

പിന്നെ വെറുതെ ഒന്ന് ട്രാവൽ ബാഗിൽ നോക്കിയപ്പോൾ ആണ് കാണുന്നത് ആദ്യം വാങ്ങി വെച്ച കുക്കീസ്‌ പാക്കറ്റ് അത് പോലെ അതിൽ ഇരിപ്പുണ്ട്...!!!

അപ്പോൾ  സ്വന്തം ബാഗ് ആണെന്ന് കരുതി തൊട്ടടുത്തിരുന്ന അയാളുടെ ബാഗിൽ അയാൾ വാങ്ങി വെച്ചിരുന്ന കുക്കീസ്‌ പാക്കറ്റ് ആണ് ആദ്യം അജോയ് എടുത്തു തുറന്നതും കഴിച്ചതും...!!!

ഇപ്പോൾ നിങ്ങൾ അയാളെ പറ്റി എന്ത് വിചാരിക്കും???

മഹാനായ മനുഷ്യൻ,

ദയാലു,

പാവം...

ഇത് വരെ എന്തൊക്കെ അയാളെ പറ്റി ചിന്തിച്ചോ അതിനെല്ലാം എതിര്..,

അല്ലെ???

ഇതാണ്, പ്രോഫൌണ്ട് പാരടൈം ഷിഫ്റ്റ്‌...!

ഒരേ സംഭവം നിങ്ങൾ ഇപ്പോൾ വേറെയൊരു  ആംഗിളിൽ കൂടി കാണാൻ തുടങ്ങി,

അതോടെ ഏറ്റവും വൃത്തികെട്ട ആൾ,

ഏറ്റവും നല്ലവൻ ആയി മാറി,

ഒരുപക്ഷെ മറ്റേ കുക്കീസ്‌ പാക്കറ്റ് നിങ്ങൾ കണ്ടില്ലായിരുന്നുവെങ്കിലോ,

എങ്കിൽ ആ  അഭിപ്രായം അങ്ങനെ തന്നെ നിന്നേനെ...!

ഒന്നാലോചിച്ചു നോക്കൂ,

ലോകത്ത് നമ്മൾ അനുഭവിക്കുന്ന എല്ലാ കാര്യങ്ങൾക്കും ഉണ്ടാവും ഇത്തരം കാണാത്ത ചില ആംഗിളുകൾ,

മറ്റൊരു വശം,

അങ്ങനെ ഒരു വശത്ത് നിന്ന് കൂടി കാര്യങ്ങളെ നോക്കിക്കാണുന്നത് നമ്മുടെ ഒരുപാടു മുൻ ധാരണകളെ മാറ്റാനും അത് വഴി വിഷമങ്ങൾ,പരാതികൾ,സങ്കടങ്ങൾ

എല്ലാം മാറ്റാനും ഉപകരിക്കും...!!!

ലോകത്തെ എല്ലാ പ്രശ്നങ്ങൾക്കും മൂന്നു വശങ്ങൾ ഉണ്ട്,

എന്റെ വശം,

നിന്റെ വശം,

യാഥാർത്ഥ വശം...!!!

നിന്റെ വശവും,

യഥാർത്ഥ വശവും മനസിലാക്കാൻ ഞാൻ ആദ്യം എന്റെ വശത്ത് നിന്നും മാറി ചിന്തിക്കണം എന്ന് മാത്രം...!

അങ്ങനെ മാറാൻ തുടങ്ങിയാൽ ജീവിതം സുഗമവും സന്തോഷം നിറഞ്ഞതും ആവും എന്ന് ഗുണപാഠം...!!!